Author: Hanna

Guðbjörg Guttormsdóttir, Hólmfríður Hartmannsdóttir og Ívar Örn Árnason frá fisksjúkdómadeild Tilraunastöðvar HÍ í meinafræði að Keldum vinna nú við smitrannsóknir í Þekkingarsetrinu undir verkstjórn Árna Kristmundssonar.

Þorskseiði eru smituð með sníkjusveppnum Loma Morhua og í rannsókninni er markmiðið að skoða þróun sýkingar við mismunandi umhverfisaðstæður.

Föstudaginn 24. maí var Sandgerðisbæ afhent glæsileg gjöf frá afkomendum Þórhalls Gíslasonar, fyrrum skipstjóra frá Sandgerði. Þórhallur varð 95 ára þann 14. maí 2011 og í tilefni af afmælinu fékk sonur hans, Jónas Karl Þórhallsson, þá hugmynd að láta útbúa skjöld með nöfnum aflakónga á vetrarvertíð í Sandgerði á árunum 1939-1991 og gefa föður sínum í afmælisgjöf frá systkinunum. Sjálfur var Þórhallur aflahæsti skipstjórinn nokkrum sinnum á þessu 52 ára tímabili og aflakóngarnir í þessum hópi oft á tíðum einnig aflahæstir á landinu.

Skjöldurinn var afhjúpaður við hátíðlega athöfn í Þekkingarsetri Suðurnesja, þar sem hann verður varðveittur og til sýnis. Margir aflakóngar Sandgerðisbæjar frá fyrri tíð voru viðstaddir athöfnina.

Reykjanes jarðvangur stendur fyrir sinni fyrstu jarðvangsviku 10. – 20. maí. Í tilefni af henni mun Þekkingarsetrið standa fyrir léttri fræðslugöngu um nágrenni Garðskagavita mánudaginn 13. maí. Fjallað verður um lífríki fjörunnar, fuglalífið og sögu svæðisins.

Gangan hefst við Garðskagavita kl. 20:00 og hvetjum við alla, börn og fullorðna, til að fjölmenna.

Nánar má lesa um jarðvangsvikuna hér.