Á efri hæð Þekkingarsetursins er að finna náttúrugripasýningu með yfir 70 uppstoppuðum dýrum. Þar má einnig sjá ýmis lifandi sjávardýr og jafnvel koma við þau. Gaman er að flétta fjöru- eða tjarnaferð saman við heimsókn á náttúrusýninguna. Þá er smádýrum safnað í fjörunni og þau svo skoðuð í víðsjá á sýningunni. Heilmikinn fróðleik er að finna í bókakosti Þekkingarsetursins sem staðsettur er á Náttúrusýningunni.
Nýjasti íbúi náttúrusýningarinnar, sem staðið hefur frá árinu 1995, er Fróðleiksfúsi. Fróðleiksfúsi er gagnvirkt spjaldtölvuforrit sem einblínir á að kenna ungum sem öldnum ýmislegt fróðlegt um dýr og vistkerfi íslenskrar náttúru. Fróðleiksfúsi, Vísindalinda, Reyn, Rýn, Lína appelsína og Rostungulli taka öll vel á móti ykkur en forritið er nú aðgengilegt bæði á íslensku og pólsku.
Fróðleiksfúsi hlaut styrki úr Uppbyggingarsjóði Suðurnesja, Menningarsjóði Suðurnesjabæjar, Samfélagssjóði HS Orku og hefur komist á laggirnar í góðu samstarfi við hönnunarfyrirtækið Jökulá og Háskólann í Reykjavík.
