Posted on

Opið fyrir umsóknir í POLARIN: Transnational Access

Opnað hefur verið fyrir umsóknir  fyrir POLARIN Transnational Access og Call to Core Repositories 2026 frá og með 1. september sl. 

Sjóðirnir styrkja aðgengi og afnot vísindamanna að 31 rannsóknarsetri og skipum víðsvegar um heimskautin þ.m.t. Þekkingarsetri Suðurnesja.

Þar af eru 16 stöðvar staðsettar á eða við norðurskautið, 9 við suðurskautið og sex á sjó.

Við hvetjum áhugasama vísindamenn sem leggja áherslu á rannsóknir, tilraunir eða aðra vettvangsvinnu á þessum svæðum að sækja um. Umsóknarfrestur er 29. október nk. kl. 16.00 (CET) eða 14.00 að íslenskum tíma.

Áhugasömum er bent á kynningarviðburð setranna þann 7. september nk. kl. 13.00 að íslenskum tíma sem fram fer í gegnum þennan hlekk.

Þá er einnig hægt að kynna sér styrkinn enn frekar á opnu netnámskeiði þann 14. september nk. kl. 11.00 að íslenskum tíma í gegnum þennan hlekk. 

Posted on

Uppbyggingarsjóður styrkir rannsóknir á hvölum

Mynd: Víkurfréttir

Þekkingarsetur Suðurnesja hlaut öflugan og mikilvægan styrk úr Uppbyggingarsjóði Suðurnesja á dögunum vegna rannsóknar-verkefnisins Hvar eru hvalirnir? sem mikið mun fara fyrir næstu misserin.

Oddný Kristrún, stjórnarformaður Þekkingarseturs Suðurnesja

Oddný Kristrún Ásgeirsdóttir, stjórnarformaður Þekkingarseturs Suðurnesja, tók við veittum styrk en afhending styrkja fór fram í Hljómahöll þann 21. nóvember sl. Alls hlutu 43 verkefni styrk til uppbyggingar á sviðum menninga og lista, nýsköpunar og atvinnuþróunar, auk ýmissa samfélagsverkefna á Suðurnesjum.

Þekkingarsetrið þakkar kærlega styrkinn og við hlökkum til að kynna komandi verkefni út á við.

Víkurfréttir 

Fleiri myndir og listi yfir úthlutanir þetta árið 

Posted on

Hvalir syngja í Þekkingarsetrinu

Þekkingarsetur Suðurnesja hóf starf sitt í vetur með nokkuð breyttum áherslum frá fyrri árum. Til starfa í setrinu er tekin Dr. Anna Selbmann en Anna tekur við störfum Sölva Rúnars Vignissonar sem líf- og vistfræðingur Þekkingarseturs Suðurnesja.

Anna lauk mastersnámi sínu við Háskóla Íslands árið 2019 og varði doktorsritgerð sína þar fyrr á þessu ári. Sérsvið Önnu og þar með enn eitt  sérsvið Þekkingarsetursins lítur að rannsóknum á hvölum og hefur Anna verið iðin við rannsóknir víða og þá sér í lagi í og við Vestmannaeyjar undanfarin ár.

Þekkingarsetur Suðurnesja býður Önnu hjartanlega velkomna til starfa en framundan er fyrsta stóra verkefni setursins er tengist hvölum og nefnist það Hvar eru hvalirnir? Aðalmarkmið verkefnisins er að leita að hvölum á Suðurnesjum og safna gögnum um viðveru tegunda hvala á svæðinu með notkun hljóðdufla og margvíslegrar vöktunar víðsvegar á Reykjanesi.
Þá verður verkefnið unnið í samstarfi við Hafrannsóknarstofnun, Háskóla Íslands og ýmsar alþjóðlegar stofnanir auk þess sem íbúar svæðisins verða hvattir til þátttöku en vonast er til þess að verkefni, sem ráðgert er til næstu fimm ára, opni ný tækifæri til nýsköpunar og þróunar atvinnulífs og menningar á svæðinu. Vænta má frekari fregna af þessu spennandi verkefni á næstunni.

Hér má kynna sér rannsóknir Önnu á samskiptum milli tveggja rándýra í sjó sem Anna vann út frá styrk úr Vísinda- og rannsóknarsjóði Suðurlands árið 2022.