Author: Hanna

Tveir þingmenn Samfylkingarinnar, Árni Páll Árnason og Oddný Harðardóttir, komu í heimsókn til okkar fyrr í mánuðinum ásamt fulltrúum bæjarstjórna Sandgerðis og Garðs, þeim Ólafi Þór Ólafssyni og Jónínu Hólm, og fulltrúa Samfylkingarfélagsins í Sandgerði, Andra Þór Ólafssyni. Þau voru hér til að kynna sér starfsemi Þekkingarsetursins og fengu skoðunarferð um rannsóknaaðstöðuna.

Annar þingmannanna reyndist mjög hugaður og náðum við þessari skemmtilegu mynd af honum þar sem hann heldur á grjótkrabba 🙂

Nemendur í grunn- og framhaldsnámi í líffræði við Háskóla Íslands komu til okkar í vikunni í verklega kennslu í áfanganum Sjávarhryggleysingjar.

Verklegi hluti áfangans felur í sér greiningu og flokkun á sjávarhryggleysingjum og gerði aðstaðan og sú vinna sem fer fram í rannsóknastöð Þekkingarsetursins nemendum kleift að skoða dýrin lifandi. Sýnin sem skoðuð voru komu úr nágrenni Sandgerðisbæjar.

Líffræðiráðstefnan 2013 verður haldin 8. og 9. nóvember í Háskóla Íslands. Líffræðingarnir á rannsóknastöð Þekkingarsetursins, þau Íris, Sunna og Sölvi, eru á fullu í undirbúningi fyrir ráðstefnuna en þau taka þátt í veggspjaldasýningunni sem verður í Öskju. Þar munu þau kynna rannsóknarverkefni sitt – Árstíðabundinn breytileiki í fjöruvistum á Suðvesturlandi, en það er eitt af því sem þau vinna að í Þekkingarsetrinu.