Category: Fréttir

Námskeið í handflökun fisks var haldið af Þekkingarsetrinu og MSS í samstarfi við fleiri aðila. Leiðbeinendur námskeiðsins voru vanir handflakarar frá Fiskverkun K&G, Fiskverkun Ásbergs – Nesfiskur lánuðu okkur aðstöðu og Stofnfiskur aðstoðaði við að útvega fisk til flökunar.

Þátttakendur fengu kennslu í handflökun á laxi, ýsu og kola og sýndu þeir góð handtök eins og sjá má á meðfylgjandi myndum.

Skráning stendur yfir á komandi námskeið Þekkingarsetursins. Nánar má lesa um þau hér.

Þekkingarsetrið og Rannsóknasetur Háskóla Íslands á Suðurnesjum eru þátttakendur í Vísindavöku Rannís sem haldin verður föstudaginn 27. september frá kl. 17-20 í Háskólabíói. Nánar má lesa um hana hérna.

Í tilefni af vísindavökunni verður haldið Vísindakaffi í Þekkingarsetrinu á fimmtudaginn, 26. september, kl. 20:00.

Erindið ber heitið: Grjótkrabbi og kræklingur – rannsóknarefni sem bragð er að! og hefst það með stuttri og lifandi kynningu á rannsóknum Rannsóknaseturs HÍ á Suðurnesjum á grjótkrabba og kræklingi. Grjótkrabbinn er nýr landnemi hér við land en allt frá 2007 hefur hann verið rannsakaður og fylgst með framvindu hans við Ísland. Kræklingurinn hefur hins vegar verið notaður undanfarin ár til rannsókna á mengun sjávar en hann hentar einstaklega vel sem mælitæki við slíkar rannsóknir. Eftir kynningu á líffræði og eiginleikum þessara ólíku tegunda fá gestir að bragða á þeim ásamt heimabökuðu brauði en Veitingahúsið Vitinn mun sjá um matreiðsluna. Við hvetjum alla til að mæta!

Mánudaginn 16. september voru 77 ár liðin frá láti vísindamannsins og heimskautafarans Jean-Baptiste Charcot, en rannsóknaskip hans Pourquoi pas? fórst við Íslandsstrendur árið 1936.

Í tilefni af því komu tveir þingmenn Frakka hingað til lands, Lionel Tardy og Axelle Lemaire. Þeir heimsóttu Þekkingarsetrið ásamt franska sendiherranum, Marc Bouteiller, og skoðuðu hjá okkur sýninguna Heimskautin heilla sem fjallar um líf og störf Charcot. Tardy er formaður vinahóps franskra og íslenskra þingmanna og Lemaire er þingmaður fyrir Frakka sem búsettir eru erlendis. Um kvöldið fóru svo fram fyrstu vinatónleikar fransk-íslensku sinfóníuhljómsveitarinnar.