Category: Fréttir

Ársfundur Stofnunar rannsóknasetra Háskóla Íslands var haldinn á Húsavík í síðustu viku. Um sjötíu manns sóttu fundinn. Á fundinum voru m.a. kynntar rannsóknir sem unnar eru við rannsóknasetur HÍ víðsvegar um landið. Soffía Karen Magnúsdóttir, meistaranemi við Rannsóknasetur HÍ á Suðurnesjum sem er önnur stoðstofnana Þekkingarsetursins, kynnti þar rannsókn sína á mögulegu eldi á evrópska humrinum á Íslandi, sem fer nú fram hér í Sandgerði.

Heimkynni evrópska humarsins eru í hlýjum sjó Miðjarðarhafsins, Svartahafsins og við Atlantshafsstrendur Frakklands, Bretlands og Spánar. Því er hann ræktaður í upphituðum sjó hér í rannsóknaraðstöðu Þekkingarsetursins. Við kjöraðstæður getur evrópski humarinn orðið allt að sextíu sentímetrar að lengd og sex kílóa þungur og þykir hinn ljúffengasti veisluréttur.

 Soffía Karen Magnúsdóttir, meistaranemi

Það er Ragnheiður Inga Þórarinsdóttir, framkvæmdastýra fyrirtækisins Svinna-Verkfræði ehf, sem hefur umsjón með rannsókninni en hún er gerð í samvinnu við Rannsóknasetur Háskóla Íslands á Suðurnesjum og Þekkingarsetur Suðurnesja, auk tveggja erlendra fyrirtækja.

Evrópski humarinn (Mynd: Halldór Pálmar Halldórsson)

Það var mikið unnið í Þekkingarsetrinu um helgina þegar þessi hressi hópur fólks mætti á roðsútunarnámskeið með Lene Zachariassen. Lene kenndi náttúrulegar aðferðir við roðsútun m.a. með álún og berki. Það er óhætt að segja að þáttakendur hafi farið glaðir og margs vísari heim á sunnudaginn eftir skemmtilegt helgarnámskeið, með fallega unnin roð í farteskinu.

Við hjá Þekkingarsetrinu þökkum Lene og öllum þátttakendum námskeiðsins kærlega fyrir yndislega helgi.

Börkurinn brotinn niður

Mismunandi sútunaraðferðir ræddar

Roðin hengd upp eftir barkarbað og  innfitun

Mismunandi roð sem hægt er að lita í regnbogans litum