Category: Fréttir

5. bekkur í Sandgerðisskóla færði á dögunum Þekkingarsetri Suðurnesja glæsilegt málverk af Sandgerðistjörn sem nemendur unnu í tengslum við tjarnarverkefni sem er samvinnuverkefni Sandgerðisskóla og Þekkingarsetursins. Verkefnið er hluti af samstarfsverkefni Sandgerðisbæjar með finnska sveitarfélaginu Mänttä-Vilppula, sem er styrkt af Comenius Regio hluta Menntaáætlunar ESB. Markmið verkefnisins er að tengja betur saman skóla og stofnanir sveitarfélaganna með sérstaka áherslu á náttúrufræði og listir. Grunnskólinn og leikskólinn í Sandgerði, Rannsóknasetur HÍ á Suðurnesjum, Náttúrustofa Suðvesturlands og Listatorg eru þátttakendur í verkefninu auk Þekkingarsetursins.

Krakkarnir hafa undanfarnar vikur fræðst um dýralíf tjarnarinnar, farið var í tjarnarveiðiferð með sérfræðingum Þekkingarsetursins og dýrin sett í búr á efri hæð setursins þar sem m.a er hægt að sjá vatnabobba, kringlubobba, tjarnatítur, hornsíli og brunnklukkur. Krakkarnir hafa unnið frábært starf og hvetjum við alla til að koma við í Þekkingarsetrið og líta listaverkið augum.

 

Veðrið lék svo sannarlega við gesti Þekkingarsetursins á föstudaginn þegar við þaragrilluðum krækling frá Íslandsskel í Reykjanesbæ.

Kræklingurinn bragðaðist einstaklega vel og kunnu bæði ungir og eldri vel að meta.

Einnig voru á boðstólnum fersk söl og purpurahimna. Purpurahimna er mest borðaði matþörungur í heimi en flestir þekkja hana sem nori sem notað er í sushi-gerð. Hún vex í fjörum landsins yfir sumartímann og bragaðst vel bæði fersk og þurrkuð.

Til að toppa annars frábæra stemningu dró einn gesturinn fram harmónikku og má svo sannarlega segja að hann hafi slegið í gegn.

Þekkingarsetrið vil þakka öllum sem tóku þátt í þessum skemmtilega degi með okkur.