Author: Hanna

Þekkingarsetur Suðurnesja mun í lok sumars setja upp ljósmynda- og sögusýninguna Garðvegur 1 – Arfur breyttrar verkmenningar. Húsnæði Þekkingarsetursins á Garðvegi 1 í Sandgerði hefur mikla sögu að geyma og á sýningunni er saga hússins sögð í máli og myndum. Í dag eru þar ásamt Þekkingarsetrinu, Rannsóknasetur Háskóla Íslands á Suðurnesjum og Náttúrustofa Suðvesturlands, en í gegnum árin hefur ýmis starfsemi verið í húsinu. Upphaflega var það byggt sem frystihús og þjónaði þeim tilgangi í áratugi.

Ef einhverjir eiga gamlar ljósmyndir af húsnæðinu eða starfseminni á Garðvegi 1 og hafa áhuga á að þær verði hluti af sýningunni mega þeir endilega senda þær á netfangið thekkingarsetur@thekkingarsetur.is ásamt upplýsingum um myndefni og ljósmyndara.

Sýningin er hluti af dagskrá Evrópska menningarminjadagsins og sett upp í samstarfi við Minjastofnun Íslands. Uppbyggingarsjóður Suðurnesja gerði Þekkingarsetrinu kleift að setja upp sýninguna með því að veita styrk til vinnslu hennar. Sýningin opnar á Sandgerðisdögum laugardaginn 29. ágúst kl. 13 og verður aðgangur ókeypis.

5. bekkur í Sandgerðisskóla færði á dögunum Þekkingarsetri Suðurnesja glæsilegt málverk af Sandgerðistjörn sem nemendur unnu í tengslum við tjarnarverkefni sem er samvinnuverkefni Sandgerðisskóla og Þekkingarsetursins. Verkefnið er hluti af samstarfsverkefni Sandgerðisbæjar með finnska sveitarfélaginu Mänttä-Vilppula, sem er styrkt af Comenius Regio hluta Menntaáætlunar ESB. Markmið verkefnisins er að tengja betur saman skóla og stofnanir sveitarfélaganna með sérstaka áherslu á náttúrufræði og listir. Grunnskólinn og leikskólinn í Sandgerði, Rannsóknasetur HÍ á Suðurnesjum, Náttúrustofa Suðvesturlands og Listatorg eru þátttakendur í verkefninu auk Þekkingarsetursins.

Krakkarnir hafa undanfarnar vikur fræðst um dýralíf tjarnarinnar, farið var í tjarnarveiðiferð með sérfræðingum Þekkingarsetursins og dýrin sett í búr á efri hæð setursins þar sem m.a er hægt að sjá vatnabobba, kringlubobba, tjarnatítur, hornsíli og brunnklukkur. Krakkarnir hafa unnið frábært starf og hvetjum við alla til að koma við í Þekkingarsetrið og líta listaverkið augum.