Category: Fréttir

Líf og fjör var í Þekkingarsetrinu um helgina. Til viðbótar við aðra helgaropnun sumarsins dvaldi hér hópur líffræðinemenda frá HÍ en heimsóknin er hluti af námi þeirra í fuglafræði.

Á myndinni eru þau með kennaranum sínum, Dr. Gunnari Þór Hallgrímssyni, Bob Dusek vísindamanni frá National Wildlife Health Center í USA og þremur líffræðingum Þekkingarseturs og Náttúrustofu. Hópurinn var á leið í fuglaleiðangur út á Reykjanes þegar myndin var tekin.

Þekkingarsetur Suðurnesja hlaut nýverið styrk úr Umhverfissjóði Fríhafnarinnar, en þetta er í annað sinn sem úthlutað er úr sjóðnum. Þekkingarsetrið, Rannsóknasetur HÍ á Suðurnesjum og Náttúrustofa Suðvesturlands hafa undanfarið unnið að grunnrannsóknum á fjörusvæðum á Reykjanesskaganum og kortlagningu á vistfræði fjaranna og hlaut setrið styrk til áframhaldandi rannsókna á fjöruvistsvæði Reykjanesskagans.

Styrkirnir voru afhentir við glæsilega athöfn 16. apríl síðastliðinn og má skoða fleiri myndir frá athöfninni og lesa um þau verkefni er hlutu styrk hérna.

Codland, Keilir og Þekkingarsetur Suðurnesja hafa gert með sér samkomulag sem miðar að verðmætasköpun í sjávarútvegi með því að tengja saman mennta- og rannsóknastofnanir og fyrirtæki í sjávarútvegi.

Codland er fullvinnslufyrirtæki í sameiginlegri eigu sjávarútvegsfyrirtækja með það að markmiði að skapa grundvöll fyrir frekari þróun í sjávarútvegi. Hlutverk Codland er að efla ímynd haftengdrar starfsemi, hámarka fullnýtingu á fisktengdum afurðum og hvetja til umræðu og samstarfs sem skilar sér í auknu verðmæti afurða.

Codland, Keilir og Þekkingarsetur Suðurnesja hafa gert með sér samkomulag sem stefnir að ofangreindum markmiðum. Með því er verið að leiða saman fyrirtæki í sjávarútvegi annars vegar og hins vegar samfélag mennta og vísinda. Þannig eru tvær auðlindir tengdar saman í þeirri trú að verðmæti aukist enn frekar.

Keilir ræður yfir einstakri aðstöðu til rannsókna og þróunarverkefna, ásamt sérhæfðum búnaði og tæknismiðju. Þá hafa fyrirtæki, meðal annars í sjávarútvegi, sóst í auknu mæli eftir því að háskólanemendur Keilis í tæknifræði takið að sér styttri og lengri verkefni. Út úr því samstarfi hafa nú þegar orðið til mörg athyglisverð nýsköpunarverkefni.

Þekkingarsetur Suðurnesja leggur m.a. áherslu á rannsóknir og athuganir á lífríki sjávar. Aðstaðan í Sandgerði býður upp á fjölbreytileg tækifæri sem meistara- og doktorsnemar nýta sér dyggilega ásamt innlendum og erlendum rannsóknastofnunum.

Með samstarfinu krækja fyrirtækin höndum saman um að nýta þau tækifæri sem auðlindir hafs og hugar fela í sér.