Category: Fréttir

Undanfarinn mánuð höfum við fengið hvorki meira né minna en 18 skólahópa í heimsókn til okkar í Þekkingarsetrið.
Krakkarnir sem heimsóttu okkur voru á breiðu aldursbili, þau yngstu á leikskólaaldri en þau elstu sem komu til okkar voru í 9. bekk.

Þrátt fyrir ólík skólastig gerðu krakkarnir nokkurn veginn það sama og vekja verkefnin og sýningarmunirnir hér í setrinu alltaf jafn mikla kátínu, sama hversu gömul börnin eru.

Nemendurnir gengu héðan út með bros á vör og vonuðust margir til þess að geta komið aftur seinna. Á meðfylgjandi myndum má sjá krakkana við leik og störf.

Fimmti ársfundur Þekkingarseturs Suðurnesja var haldinn í gær. Auk hefðbundinna ársfundastarfa voru tvær áhugaverðar kynningar á dagskrá.

Sölvi Rúnar Vignisson, líffræðingur hjá Þekkingarsetrinu, kynnti rannsóknaverkefnið Áhrif loftslagsbreytinga á farfuglastofna, sem unnið verður að hér á Suðurnesjum á næstu mánuðum.
Þá kynntu Sölvi og Þuríður Aradóttir Braun, verkefnastjóri hjá Markaðsstofu Reykjaness nýtt fuglaskoðunarkort af Reykjanesi. Kortið er samstarfsverkefni Þekkingarsetursins, Náttúrustofu Suðvesturlands, Reykjanes jarðvangs og Markaðsstofu Reykjaness og er stefnt að útgáfu þess á næstu mánuðum, bæði á prentuðu og rafrænu formi. Rafræna útgáfan verður aðgengileg á vefnum www.visitreykjanes.is

Bæði þessi verkefni voru styrkt af Uppbyggingarsjóði Suðurnesja.

Dagana 24. – 27. janúar fór fundur rannsóknarsamtakanna INTERACT (International Network for Terrestrial Research and Monitoring in the Arctic) fram hér á Suðurnesjum. Þekkingarsetur Suðurnesja ásamt stoðstofnunum þess eru aðilar að samtökunum, ásamt 78 öðrum háskólum og rannsóknastöðvum viðsvegar um heiminn.

INTERACT er alþjóðlegt net rannsóknastöðva á norðlægum slóðum sem fékk nýverið styrk úr Horizon 2020 sjóði Evrópusambandsins til áframhaldandi starfs. Var fundurinn hér á Suðurnesjum sá fyrsti í nýrri fjögurra ára starfslotu. Meginhlutverk INTERACT er að byggja upp aðstöðu og þekkingu til að skilgreina og bregðast við umhverfisbreytingum á norðlægum slóðum.

Þekkingarsetrið kom að skipulagningu fundarins en á honum voru alls 57 manns, þar af komu um 50 erlendis frá. Fundurinn var haldinn á Park Inn by Radisson hótelinu í Keflavík og gekk hann einstaklega vel.

Byrjað var á að heimsækja Þekkingarsetur Suðurnesja þar sem þátttakendur fengu kynningu á rannsóknarstarfi þess og leiðsögn um aðstöðuna. Eftir kynninguna gæddu þeir sér svo á ljúffengri sjávarréttasúpu frá Vitanum. Hópurinn fór einnig í ferð um Reykjanesið undir skemmtilegri leiðsögn Ólafs Jóns Arnbjörnssonar, skólastjóra Fisktækniskólans, og skelltu sér svo í Bláa lónið.

Með fundinum fékk Þekkingarsetrið og stoðstofnanir þess gott tækifæri til þess að kynna starfsemi sína, sem vonandi á eftir að fjölga heimsóknum erlendra vísindamanna í setrið.