Category: Fréttir

Nú erum við loksins farin að flokka sorpið sem til fellur á Garðveginum, líffræðingunum okkar til mikillar ánægju eins og sjá má á meðfylgjandi mynd 🙂

Við tókum upp svokallað tveggja tunnu kerfi með litlum tilkostnaði og sjáum fram á að kostnaður vegna sorphirðu lækki þar sem ekki þarf að greiða fyrir það sem fer í endurvinnslutunnuna.

Í aðra tunnuna fer það sem hægt er að endurvinna – pappi, plast og málmur og í hina tunnuna fer allt hitt. Það var mjög lítið mál að koma þessu í framkvæmd og hvetjum við öll fyrirtæki til að gera slíkt hið sama!

Undanfarinn mánuð höfum við fengið hvorki meira né minna en 18 skólahópa í heimsókn til okkar í Þekkingarsetrið.
Krakkarnir sem heimsóttu okkur voru á breiðu aldursbili, þau yngstu á leikskólaaldri en þau elstu sem komu til okkar voru í 9. bekk.

Þrátt fyrir ólík skólastig gerðu krakkarnir nokkurn veginn það sama og vekja verkefnin og sýningarmunirnir hér í setrinu alltaf jafn mikla kátínu, sama hversu gömul börnin eru.

Nemendurnir gengu héðan út með bros á vör og vonuðust margir til þess að geta komið aftur seinna. Á meðfylgjandi myndum má sjá krakkana við leik og störf.

Fimmti ársfundur Þekkingarseturs Suðurnesja var haldinn í gær. Auk hefðbundinna ársfundastarfa voru tvær áhugaverðar kynningar á dagskrá.

Sölvi Rúnar Vignisson, líffræðingur hjá Þekkingarsetrinu, kynnti rannsóknaverkefnið Áhrif loftslagsbreytinga á farfuglastofna, sem unnið verður að hér á Suðurnesjum á næstu mánuðum.
Þá kynntu Sölvi og Þuríður Aradóttir Braun, verkefnastjóri hjá Markaðsstofu Reykjaness nýtt fuglaskoðunarkort af Reykjanesi. Kortið er samstarfsverkefni Þekkingarsetursins, Náttúrustofu Suðvesturlands, Reykjanes jarðvangs og Markaðsstofu Reykjaness og er stefnt að útgáfu þess á næstu mánuðum, bæði á prentuðu og rafrænu formi. Rafræna útgáfan verður aðgengileg á vefnum www.visitreykjanes.is

Bæði þessi verkefni voru styrkt af Uppbyggingarsjóði Suðurnesja.