Author: Hanna

Þekkingarsetur Suðurnesja er aðili að samstarfsverkefni Sandgerðisbæjar með finnska sveitarfélaginu Mänttä-Vilppula, en verkefnið er styrkt af Comenius Regio hluta Menntaáætlunar ESB. Markmið verkefnisins er að tengja betur saman skóla og stofnanir sveitarfélaganna með sérstaka áherslu á náttúrufræði og listir. Grunnskólinn og leikskólinn í Sandgerði, Rannsóknasetur Hí á Suðurnesjum, Náttúrustofa Suðvesturlands og Listatorg eru þátttakendur í verkefninu auk Þekkingarsetursins.

Í lok apríl sl. var annar fundur verkefnisins haldinn og fóru þá fulltrúar stofnananna hér í bænum í heimsókn til Finnlands. Ferðin gekk mjög vel og voru vinnufundir árangursríkir. Við heimsóttum bæði grunn- og leikskóla, listasafn og nokkur gallerý. Hópnum var einnig boðið í íslenska sendiráðið í Helsinki og til bæjarstjóra sveitarfélagsins Mänttä-Vilppula. Verkefnið er til tveggja ára og lýkur sumarið 2015. Meðfylgjandi eru nokkrar myndir úr ferðinni.

Líf og fjör var í Þekkingarsetrinu um helgina. Til viðbótar við aðra helgaropnun sumarsins dvaldi hér hópur líffræðinemenda frá HÍ en heimsóknin er hluti af námi þeirra í fuglafræði.

Á myndinni eru þau með kennaranum sínum, Dr. Gunnari Þór Hallgrímssyni, Bob Dusek vísindamanni frá National Wildlife Health Center í USA og þremur líffræðingum Þekkingarseturs og Náttúrustofu. Hópurinn var á leið í fuglaleiðangur út á Reykjanes þegar myndin var tekin.

Þekkingarsetur Suðurnesja hlaut nýverið styrk úr Umhverfissjóði Fríhafnarinnar, en þetta er í annað sinn sem úthlutað er úr sjóðnum. Þekkingarsetrið, Rannsóknasetur HÍ á Suðurnesjum og Náttúrustofa Suðvesturlands hafa undanfarið unnið að grunnrannsóknum á fjörusvæðum á Reykjanesskaganum og kortlagningu á vistfræði fjaranna og hlaut setrið styrk til áframhaldandi rannsókna á fjöruvistsvæði Reykjanesskagans.

Styrkirnir voru afhentir við glæsilega athöfn 16. apríl síðastliðinn og má skoða fleiri myndir frá athöfninni og lesa um þau verkefni er hlutu styrk hérna.