Category: Fréttir

Hér í Þekkingarsetrinu erum við með í boði skemmtilegan fjölskylduratleik sem kallast ,,Fjör í fjörunni.‘‘ Ratleikurinn fer fram utandyra og er markmiðið að finna ýmsa hluti og staði í náttúrunni út frá gefnum vísbendingum.

Þegar ratleikurinn hefst þarf að hafa í huga að vísbendingarnar er að finna í Sandgerði og nágrenni Sandgerðis og þess vegna þurfa þátttakendur að vera á bíl og með myndavél meðferðis til þess að geta tekið þátt.

Þátttaka í fjölskylduratleiknum kostar aðeins 1.000 kr. og er aðgangur að sýningum Þekkingarsetursins innifalinn. Ef allt reynist rétt er glaðningur í boði.

Sýningar setursins eru opnar frá kl. 13-17 um helgar í sumar og frá kl. 10-16 á virkum dögum. Hlökkum til að sjá ykkur!

Í sumar hefur verið mikið líf og fjör hjá okkur í Þekkingarsetrinu, en á einum mánuði fengum við til okkar 25 skólahópa með rúmlega 1.200 flottum krökkum. Þeir voru á breiðu aldursbili, allt frá börnum sem eru á síðasta árinu í leikskóla upp í unglinga í 9. bekk.

Þegar við fáum skólahóp í heimsókn er fyrirkomulagið yfirleitt svipað óháð aldri nemenda. Hóparnir byrja ferðina á að fara annað hvort í Garðskagafjöru eða Sandgerðistjörn til að safna sýnum þaðan. Þegar inn í Þekkingarsetrið er komið skiptum við krökkunum í hópa þar sem þeir fá að skoða sýnin í víðsjám, fara í ratleiki um húsið og hlusta á sögu um franska vísindamanninn og heimskautafarann Jean- Baptiste Charcot. Eldri nemendur prófa gjarnan að greina sýnin sem þeir söfnuðu með sérstökum greiningarlyklum.

Allir krakkarnir sem komu voru skólunum sínum til fyrirmyndar og virtust hafa mjög gaman af heimsókninni í Þekkingarsetrið. Við þökkum þeim og kennurunum kærlega fyrir komuna og hlökkum til að sjá þá aftur hér síðar.

Síðustu vikur hafa líffræðingar Þekkingarsetursins og Náttúrustofu Suðvesturlands unnið að kortlagningu sílamáfavarpsins á Miðnesheiði.


Vinnan er hluti af verkefninu Samfélagsvísindi á Suðurnesjum sem styrkt er af Uppbyggingarsjóði Suðurnesja, og hefur það að markmiði að gefa almenningi tækifæri til að taka þátt í raunverulegum rannsóknum. Einn slíkur viðburður var haldinn um síðustu helgi þegar nokkrir vaskir Suðurnesjabúar tóku þátt í talningunni með okkur.

Stærsta varpsvæði sílamáfsins á Íslandi er á Miðnesheiðinni en langt er síðan það var kortlagt síðast. Því verður mjög spennandi að sjá niðurstöður verkefnisins. Við þökkum þátttakendum í verkefninu kærlega fyrir aðstoðina.