Mikið fjör hefur verið hérna hjá okkur í Þekkingarsetrinu síðustu vikur því yfir 1.000 nemendur úr leik- og grunnskólum hafa heimsótt okkur í maí og júní. Krakkarnir voru á öllum aldri, sumir héðan af Suðurnesjum en aðrir af höfuðborgarsvæðinu.
Flestir skólanna fóru með nemendur í fjöruferð sem gengu vel, þrátt fyrir leiðinlegt veður oft á tíðum, og nemendur komu klyfjaðir tilbaka af ýmsum furðudýrum úr fjörunni.
Nemendur fá að borða nestið sitt um borð í skipi Jean-Baptiste Charcot sem líkt er eftir á sýningunni Heimskautin heilla. Sumir hóparnir grilluðu líka pylsur fyrir utan.
Það er margt að sjá í Þekkingarsetrinu og vekja lifandi sjávardýrin alltaf mikla athygli. Ef að krakkarnir finna einhver dýr á lífi í fjörunni fá þeir að bæta þeim í búrin.
Við þökkum öllum þeim nemendum og kennurum sem heimsóttu okkur kærlega fyrir komuna, vonum að þið hafið haft bæði gagn og gaman að!
Guðbjörg Guttormsdóttir, Hólmfríður Hartmannsdóttir og Ívar Örn Árnason frá fisksjúkdómadeild Tilraunastöðvar HÍ í meinafræði að Keldum vinna nú við smitrannsóknir í Þekkingarsetrinu undir verkstjórn Árna Kristmundssonar. 
Föstudaginn 24. maí var Sandgerðisbæ afhent glæsileg gjöf frá afkomendum Þórhalls Gíslasonar, fyrrum skipstjóra frá Sandgerði. Þórhallur varð 95 ára þann 14. maí 2011 og í tilefni af afmælinu fékk sonur hans, Jónas Karl Þórhallsson, þá hugmynd að láta útbúa skjöld með nöfnum aflakónga á vetrarvertíð í Sandgerði á árunum 1939-1991 og gefa föður sínum í afmælisgjöf frá systkinunum. Sjálfur var Þórhallur aflahæsti skipstjórinn nokkrum sinnum á þessu 52 ára tímabili og aflakóngarnir í þessum hópi oft á tíðum einnig aflahæstir á landinu. 
